【明報專訊】保安局長李家超日前表示正引用《社團條例》，擬禁止「香港民族黨」運作。《大公報》大公網隨即喺facebook圖文並茂發帖，話工聯會立法會議員何啟明支持政府做法，認為「不能姑息港獨」，但不幸錯用咗民協何啟明張相。其實兩個何啟明都唔係第一次被人調轉錯誤引用，工聯會何啟明就諗咗個方法，希望網民分到佢喇。

黨友郭偉強﹕我都可能搞錯

工聯會何啟明噚日喺自己fb上載一幅圖，借用「where's wally」嘅公仔，將自己同民協嗰個何啟明嘅大頭放喺圖中，請網民搵下邊個係佢，幅圖叫「where's 工聯會何啟明？」結果連佢黨友、工聯會郭偉強都笑住留言話：「頂，咁細，真係好難分。連我都可能搞錯。」工聯會何啟明講笑，原來有唔少朋友都會將佢同另一政黨同名同姓嘅何啟明調亂，為咗令大家更加認得佢，就整呢幅圖考考眼力。大家又睇下張圖入面有幾多個佢！

至於大公網嘅post其後刪咗，首先發現嘅係民協何啟明，佢喺fb轉貼有關報道，指「我都覺得不能姑息呢d咁烏龍嘅人同事」；而工聯會何啟明亦截圖轉載有關報道，抽水話「譴責港獨是所有 何啟明的共同責任」。