【明報專訊】教育局噚日向各中小學校長發通告，推出「改革開放四十年專題研習獎勵計劃」，話旨在鼓勵學生關心國家發展同未來路向，多啲認識改革開放，同香港喺過程中嘅角色，掌握未來嘅機遇等。計劃分為小學組(小四或以上)、初中組及高中組3個組別，畀每間學校派最多3隊、每隊最多4名學生參加，分別就「祖國今昔」、「轉變與發展」和「繼往開來」3個主題研習，範圍包括居住環境、城市發展、國際事務，以至綜合國力發展等，但就無特別提到政治和民主。 主題未提政治民主 各組設冠、亞軍各1名同優異獎3名，得獎學生除咗有獎狀之外，仲可以聯同該校提名嘅一名教師，一齊參加與改革開放40年相關嘅內地交流團。 教協理事、中學通識科教師方景樂話，雖然計劃冇明確咁講政治同民主可以研究，但佢認為措辭上用到「機遇」、「挑戰」等字眼，亦冇限制學生探究改革開放嘅負面問題，有空間可以睇番一啲政治事件，如改革開放引致嘅「官倒」現象，成為「八九民運」抗議嘅問題之一。 方景樂又認為，畀獲獎學生參加相關嘅交流團都正常，因為局方想增進學生呢方面嘅認識，但佢希望局方唔好有偏頗，只講改革開放好嘅一面，好壞都應該要講。
|
| |
| |
