【明報專訊】被視為街工老牌立法會議員梁耀忠接班人嘅葵青區議員黃潤達早前宣布退出街工，阿忠連日嚟都無回應，Emily噚日終於喺立法會見到阿忠，但佢唔肯回應阿達退黨嘅事，仲叫Emily問番阿達。至於接班人退黨會否影響交棒部署，阿忠話黨內都無傾，答唔到。
七一遊行當日，黃潤達有現身，並同街工勞工組一齊參與遊行，當日Emily就搵唔到阿忠。被問到有無參加七一遊行，阿忠話不論有無去遊行都唔想答呢個問題。
另外，阿忠噚日喺立法會大會上，不點名為已離世嘅「賊王」葉繼歡發聲。葉曾因為懲教署拒絕安排佢接受中醫診治而提出司法覆核，案件審理前葉已病逝，死因庭陪審團早前建議當局考慮喺監獄醫院為犯人提供中醫服務嘅選擇。阿忠向保安局長李家超提出質詢，想了解當局現行做法。李回應話懲教署正研究陪審團嘅建議，亦會同衛生署、醫管局探討有關建議。
