【明報專訊】民主黨舉行緊一年一度嘅獎券籌款活動，不過有黨中人就大吐苦水，話今年有好多籌款街站都不獲政府批准，令籌款難咗。據了解，民主黨今年喺全港批准開站嘅地點得200個左右，比去年減少咗大約100個，即係少咗1/3。 民主黨大埔區議員區鎮樺話，今年有大量籌款街站「不獲政府批准」，指去年喺大埔有20幾個站，今年政府批得8個，「對我哋靠街頭售賣獎券籌款嘅團隊造成好大影響」。佢指籌款額多寡對地區工作都有好大影響。 民主黨立法會議員林卓廷就同Emily講，審計署早年就街頭籌款活動做調查，令到地政總署今年加強規管申請。阿廷話，今年民主黨申請籌款街站時，有唔少地點都唔批，包括有啲繁忙人多嘅地點，如中環華人行；另外，有啲地點過去因為申請咗後遇上突發情况無法開站，今年呢啲地點都無法再申請，所以令街站數目減少。 質疑華人行外畀搞反佔中唔畀籌款 阿廷話，已經同民政事務局長劉江華開會反映，希望有啲街站地點可以重開。佢舉例指昔日華人行都可以畀建制派做街站收集反佔中簽名，點解唔可以畀民主黨擺籌款街站呢？
|
| |
| |
