【明報專訊】立法會早前組團考察大灣區，港台節目《議事論事》近日播出新民黨容海恩(Eunice)隨團受訪片段，一句「我覺得議會內外都唔應該牽涉太多政治」成為網絡熱話，唔少網民二次創作，以「學校不應牽涉太多學習」、「公司內外都不應該牽涉太多三文治」等造句諷刺Eunice。Eunice噚日就喺facebook「三創」反擊，借民主黨許智峯涉搶手機一事抽水，話「少講政治 都要譴責許智峯」、「少講政治 同你講刑事」。

Eunice喺節目上被問到點解考察時未提到高鐵一地兩檢爭議，佢回應話：「我覺得議會內外都唔應該牽涉太多政治，應該講番實際情况，講番社會需要，市民嘅需求，佢哋嘅期望。」呢番言論引起部分網民批評，認為作為議員講政治係合理嘅事，又以「公司不應牽涉太多工作」等句子諷刺容議員。

「高姿態牽起聯署 或被人攻擊」

Eunice日前發起譴責許智峯嘅公眾聯署，佢噚日喺facebook貼文時，同時呼籲市民支持聯署譴責許智峯。Eunice認為，網民嘅諷刺係針對佢嘅聯署行動，自己「高姿態牽起聯署，會有被人攻擊可能性」，有人會趁機炒作，但正如佢facebook所講，「無謂的個人攻擊唔會阻到聯署行動」。