【明報專訊】政府推動全民閱讀，中央圖書館4月22日會搞一場破格嘅同樂日，配合4月23號嘅「世界閱讀日」。圖書館總館長(香港中央圖書館及推廣活動)鄭劉美莉喺康文署嘅傳媒茶敘上同Emily透露咗當日有咩活動，佢話圖書館環境好靜，唔畀影相，不過同樂日就唔同喇，中圖將有現場音樂演奏，例如爵士樂，仲有時段畀市民點唱𠻹。
Emily記得歷史博物館舊年搞咗個玩具展，其中戶外展出咗一堆鴨仔，成為「影相位」，鄭劉美莉話中央圖書館當日都有鴨仔畀大家影相，但由於圖書館空間不大，所以數量不多。
鄭劉美莉又話同樂日都適合年輕人，因為戶外有陶笛演奏，適合大家一邊歎咖啡一邊聽音樂，好有「文青feel」喎。佢笑言希望同樂日利用破格、跳脫嘅活動吸引多啲人去圖書館，以往周六、日中圖都有逾萬人入場，佢希望同樂日嘅入場人次以倍數增長。
