政協促刪殖民符號 由路名開始 佘德聰：勿用人民廣場
[2018.03.05] 發表
【明報專訊】皇后大道東、英皇道、太子道、麥理浩徑……香港多處嘅街名路名都搵到港英殖民年代嘅歷史，有港區政協噚日向中央獻計，喺小組會上提出要加強愛國情懷，促請特區政府去掉同減少殖民政府留低嘅符號，例如由香港地名同道路名開始。但有立法會議員就覺得無必要咁做。
福建社團活躍分子 曾搞「夜總會」
提出刪改路名建議嘅係政協佘德聰，睇番資料，佢係福建社團嘅活躍分子，有說佢係福建泉州來港人士，係香港福建社團聯會董事，佢間公司叫德輝國際，公司網頁話喺內地搞房地產，仲有搞「夜總會娛樂世界」。佘德聰噚日同Emily講，好多港人無國嘅概念，提出建議係希望可以畀港人對國家有更多歸屬感，「等我哋忘記以前嗰段慘痛嘅歷史，我哋被殖民百幾年，英國無畀香港人國嘅感覺」。佢話，香港唔少街道同建築物都有殖民政府留低嘅符號，建議可以用一啲「香港元素」改名，「太平山、獅子山就係香港元素……唔好用人民廣場，會嚇親人」。佘德聰又話，自己喺香港40幾年，又指「夜總會娛樂世界」只係喺1990年代初期搞嘅「餐飲娛樂」業務，𠵱家已經無搞喇。
葉建源：無必要否定英治歷史
立法會教育界議員葉建源就話，街道名係香港歷史一部分，無必要否定英治時期嘅歷史。佢又話，其實香港有唔少街道都以內地城市命名，例如「上海街」、「南京街」、「廣東道」等，顯示香港融合咗四方八面嘅文化特色，唔一定要否定同忘記佢哋嘅。
更多港聞
學友社調查：逾半考生不了解計劃 六成人指資助未增內地升學意願
【明報專訊】學友社今年1月以問卷調查訪問1125名應屆文憑試考生，發現六成半受訪學生不同意政府提供的內地升學資助計劃會增加其內地升學的意願，... 詳情相關新聞
