【明報專訊】港澳辦主任張曉明1986年喺中國人民大學法律系刑法專業研究生班畢業後，一直喺港澳辦工作，佢喺新一期《紫荊》雜誌中以??知遇之恩與品格垂範——憶魯平同志??為題撰文，憶述當年加入港澳辦，以至同已故港澳辦前主任魯平嘅相處點滴，原來當年張畢業後有機會留喺大學教書，但最終魯平令佢加入港澳辦。

飲咖啡出洋相 魯平提點

張曉明喺文中透露，當年喺上述研究班畢業時，其實有機會留校任教，等佢可以讀博士研究生，但佢就打算出去闖吓，而第一個聯繫嘅機構係中紀委，發現當時中紀委無招募計劃，但偶然睇《人民日報》一篇「豆腐塊大」嘅報道就吸引咗佢，呢篇係關於魯平率領法律專家小組在港工作嘅報道。佢想用自己嘅法律專業參與香港回歸準備工作，於是向魯平寫求職自薦信，經多重考核、了解，張獲聘加入港澳辦，而當時面試嘅，就係後來位至港澳辦副主任嘅徐澤。

張曉明形容魯平對同事好關心，提到第一次在香港參與基本法起草委員會聚餐，佢點一杯咖啡，用咖啡匙攪拌後，就連匙子拎起咖啡飲。魯平見到就輕聲提醒，應該將匙擺番喺托碟上，唔可以「舀著喝」或放喺杯中「一起端著喝」，張曉明意識到出咗洋相，有啲無地自容，讚歎魯平對年輕幹部嘅觀察同提醒可謂細緻入微。