【明報專訊】禮拜六就係重陽節,但喺赤柱監獄服刑嘅阿成(化名)就未能去登高掃墓,只能遵從媽媽生前遺下嘅教誨,喺獄中努力進修,重新做人以報親恩。
57歲嘅阿成以前係黑社會,因為一宗仇殺案被判終身監禁。阿成話入獄初期仍然不知悔改,直至一次媽媽同佢講:「阿仔,無論你做過幾多壞事、錯事,媽媽都會原諒你、都會愛你,但見到你今日仍然不知悔改,媽媽就會好傷心。」阿成終於有所醒覺,重新審視生命嘅責任。
阿成話,覺得喺自己最絕望、最失落嘅時候,媽媽仍不離不棄,「我媽媽仍覺得我係佢嘅希望」;加上望住母親滿頭白髮、駝背嘅身影,阿成決定重新做人,於是同囚友一齊進修,組別主管亦察覺到阿成嘅巨大改變。
阿成參與懲教署嘅「預防暴力心理治療計劃」,認識到自己嘅暴躁性格並非與生俱來,一步一步改變。佢改過自新嘅故事《給天國媽媽的信》,最近上載到懲教署YouTube頻道,Emily誠意推介畀大家。