【明報專訊】身兼行會成員和立法會議員嘅經民聯林健鋒下周一(23日)65歲牛一，噚日成班黨友，包括立法會主席梁君彥、議員梁美芬、張華峰等同佢慶祝。佢話自己嘅生日願望係希望社會年年都有好嘅環境，等年輕人可以升職加薪，而且社會和諧，人人都快快樂樂。張華峰就搞笑咁問林健鋒係咪可以攞長者優惠，用兩蚊搭車。林話𠵱家成日都話要保障老人家嘅退休生活，佢就認為身體健康最重要，如果唔係有咩保障都冇用。

林健鋒又講起上次同張華峰接受Ice-cream challenge，兩人喺立法會外蒙眼互餵甜筒，為導盲犬協會籌款。林健鋒話張華峰急住拎雪糕搞到仆親，笑佢嗰一跌搞到立法會地震咁滯，張華峰就話嗰一跌直頭係「核爆」咁重分量，仲話自己條褲都爛埋，不過就無乜大礙。