譚文豪實測 指高鐵唔快 福田到廣州東需110分鐘

譚文豪實測指高鐵唔快福田到廣州東需110分鐘

[2017.08.09] 發表

【明報專訊】政府推銷高鐵一地兩檢，其中重點係宣傳有咗高鐵就會更方便、慳時間，泛民過去重點質疑一地兩檢嘅法律根據，而公民黨立法會議員譚文豪(Jeremy)近日就親身測試，由福田坐高鐵去廣州南站，以及喺廣州東站坐和諧號返羅湖，睇吓高鐵係咪真係咁方便，更剪輯咗一條4分幾鐘嘅片段，用經歷反駁政府高鐵好快嘅講法。

指無位坐企足全程

過去政府力銷有咗高鐵，由西九搭車去廣州，最快只需約48分鐘；Jeremy喺片中睇住福田嘅高鐵時刻表，見到由福田去到廣州南站需時47至50分鐘不等，連同政府估算由西九去到福田需時14分鐘，車程加埋超過1個鐘。而佢即日買飛只買到二等票，無位坐要企足全程，質疑係咪真係有建制派議員所講「一啲都唔迫」。

Jeremy話廣州南其實即係番禺，搭番廣州地鐵去港人比較熟悉嘅廣州東站、即係天河區一帶，單係地鐵車程已經用咗46分鐘。Jeremy回程就由廣州東站搭和諧號返羅湖，唔使轉車，車程共1小時18分鐘。但高鐵由福田到廣州東轉埋地鐵，就要成110分鐘。

政府：紅磡直通車比高鐵慢

Jeremy質疑高鐵香港段主隧道，同廣州南去廣州東站嘅車路，一樣係26公里，由廣州南站坐地鐵返市中心要46分鐘，咁究竟喺西九坐高鐵有幾便捷呢？

不過，政府就喺facebook不點名反駁，但用嘅類比就好奇怪，當譚文豪用高鐵比較𠵱家嘅高速火車和諧號，政府就用人所皆知速度慢嘅紅磡直通火車，同將來高鐵比較，話由紅磡坐車去廣州東站要117分鐘，再坐地鐵去市中心「公園前」站要17分鐘，結論梗係話高鐵會快啲到市中心。