【明報專訊】經民聯立法會議員梁美芬本身係城大法律學者，擅長研究《基本法》，而呢個暑假佢話好忙，要再研習一國兩制，但佢唔喺香港或內地研習，而係走去美國路易斯安那州(Louisana)，考察當地嘅「一國兩制」！

梁美芬同Emily講，8月份會好長時間唔喺香港，先會去美國探仔，然後一家人會參加加勒比郵輪團旅行。不過，佢之後會留喺路易斯安那州大概兩個禮拜做學術交流，佢獲當地機構邀請去考察同發表演講，題目係「Hybridity of common law and civil law : Hong Kong Practice」，大意係指香港係行獨特嘅一國兩制，法制行普通法，但一國就行大陸法制度。梁美芬話，路易斯安那州其實都係一個好特別嘅法制地區，同法國有歷史淵源，係美國唯一保留大陸法嘅州份。佢仲話多年前已經帶過一批內地法官去當地考察，而今次佢再去美國，想留長啲時間，觀摩埋當地法院點樣審案。

近期香港社會討論一國兩制，梁美芬之前就利用呢個題目，寫咗篇學術文章刊登喺學術期刊，評論一地兩檢衍生嘅各項法律爭議。