周六投票 翌日列學校假期 政府提3方案加快點票

周六投票翌日列學校假期政府提3方案加快點票

[2017.07.18] 發表

【明報專訊】以往選舉日，個別票站點票時有發生問題，結果去到清晨都未能完成點票等工作，而選舉亦出現難以借場做投票站、點票站嘅情况，立法會政制事務委員會噚日討論檢討區議會、立法會選舉嘅投票站及點票站運作。當局提出3個方案希望解決問題，包括將選舉日定喺周六、設分區點票站，以及將選舉日翌日定為學校假期。

並倡設分區點票站

政府話3個方案各有利弊，好似選舉定於星期六，選民未必適應；設立分區點票站亦需要額外增加3000名公務員負責點票、選票運送時亦有保安風險等；至於將選舉日翌日定為學校假期，學校同家長亦會反對。

工聯會同民建聯都話，目前投票時間太長，影響到點票工作，同意縮短投票時間；工聯會麥美娟建議將投票時間由朝7點半至晚10點半，改為朝七晚六，但表明反對將選舉改為周六，話選舉需要動員義工，改動亦會影響選民投票嘅方便。民建聯張國鈞就話要取得平衡，提出係咪可以先縮短半個鐘嘅投票時間。不過，公民黨郭家麒就話唔會贊成縮短投票時間。

政制及內地事務局長聶德權話，現時投票時間長，對係咪調整持開放態度。