500學生入營軍訓 淋雨聽分享
[2017.07.18] 發表
【明報專訊】近年暑假，都有唔少學生參加軍訓營，噚日係解放軍駐港部隊等主辦嘅青少年軍事夏令營開營禮，有近500個中學生參加，人數同上年差唔多。典禮開始無耐忽然落大雨，成班學生迅速喺隨身袋拎出雨褸披上身，有人則被雨淋到「開唔到眼」，照坐定聽人講嘢。Emily佩服班同學仔，不過都擔心佢哋會病。
夏令營對象係中三至中五學生，喺駐港部隊粉嶺新圍軍營舉行，參加者前日已經入營，會受訓到30號。活動同軍事有關，包括紀律訓練、體能訓練同專題講座等，又要學軍體操。喺呢15日內，同學被沒收電話。
其中升中五、讀布廠商會朱石麟中學嘅周鋒話已經做好心理準備訓練會好辛苦，佢喺軍營入面會「訓練良好作息，規劃生活時間……訓練站姿、坐姿」，同校另有5個同學參加。被問對自己嘅身分認同，兩歲由廣州嚟香港嘅周鋒強調自己「一定係中國人」，佢話自從佔中之後，內地同香港嘅矛盾開始加劇，佢就覺得兩地係一家，而香港屬於中國，唔贊同中間要有矛盾。周同學又話國民身分認同應從小開始培養。Emily問佢日後有咩目標，佢就話想投考警察。
更多港聞
相關新聞
