【明報專訊】由湯家驊創辦嘅民主思路近日落實同港大專業進修學院(SPACE)合作，推出「資深行政人員文憑(政治領袖)課程」，請嚟多名政界同學界重量級人物講課，包括立法會(局)前主席曾鈺成同黃宏發、行會召集人林煥光、港大前校長徐立之等，學員除咗學習政治理論、應對傳媒同選舉工程，亦要落區同地方團體接觸。民主思路強調舉辦課程係想提升從政者質素，唔係揀蟀或搞「黨校」咁話。 學費2.8萬 收生不考慮政治取向 佢哋噚日開記招公布詳情，課程7月起接受報名，報讀者要有大專學位、中英文良好同介乎20歲至35歲，政治取向並非收生考慮，課程10月開學，為期8個月，課堂時數110個鐘，盛惠2.8萬元。課程會由民主思路收集報名，取錄與否由專業進修學院把關，民主思路會為表現優異嘅學生提供獎學金。 功課方面，學員要提交政策專題，民主思路話會爭取畀學員向下屆政府問責官員匯報專題。召集人湯家驊(Ronny)話，現階段難講會邀請咩層級嘅問責官員，佢話課程歡迎公務員報讀，因為公務員都要具備政治知識，如果有意更上一層樓，就要裝備自己。 入行會？ 湯家驊：遲吓就知 講到更上一層樓，政界盛傳Ronny會加入新政府嘅行政會議，Ronny噚日對此不置可否，話大家過多一兩個禮拜就知道。
|
| |
| |
;){kind=small}
