《明報》報業公會奪15獎 張建宗：每日睇晒所有報紙
【明報專訊】一年一度嘅報界盛事香港報業公會「2016年最佳新聞獎」噚日頒獎，《明報》同事交出亮麗功課，奪得15個獎，包括「最佳新聞報道」冠軍同「最佳新人」冠軍，Emily喺度恭喜各位得獎同事。
報業公會﹕盼讀者勿吝嗇買報
報業公會主席甘煥騰致辭時話，行業前景不佳，猶幸仍有唔少新聞工作者堅守崗位，希望讀者唔好吝嗇購買報紙，同拎免費報紙，亦希望廣告商以實際行動支持報業。主禮嘉賓政務司長張建宗就話，20多年來每日都睇十幾份報紙，從無間斷，即使放假都會周圍跑去搵齊咁多份報紙嚟睇，又重申政府一直致力維護香港嘅新聞、編輯和言論自由。
明報大豐收，其中「巴拿馬文件香港篇」奪得「最佳新聞報道」冠軍。我哋同國際調查記者同盟(ICIJ)合作，由偵查、港聞、經濟同政情組記者完成報道，揭發多名中港政商名人擁有離岸公司。而偵查組作品「屏山鄉委主席涉霸官地營車場」，為橫洲事件引起「官商鄉黑」勾結嘅討論揭開序幕，奪得「最佳獨家新聞」季軍。
康橋之家前院長張健華涉嫌性侵智障女院友一事，引起大眾關注精神上無行為能力人士嘅法律權利。明報同事除咗最先搵到張健華獨家回應，亦分析數據展示殘疾院舍規劃停滯多年，「殘疾人士院舍性侵事件系列」報道奪得「最佳新聞報道」優異獎。有份參與報道嘅葉真真就奪得「最佳新人」冠軍。
另外，中國組同經濟組記者鄭海龍、李泉、陳子凌、顧冷冰憑「中國經濟L形走勢系列」奪得「最佳經濟新聞報道」亞軍；中國組憑「文革50周年系列」奪得「最佳新聞報道」季軍。
編輯組及美術組亦奏捷，旺角大衝突嘅版面〈旺角衝突定性暴亂〉，取得「最佳新聞版面(系列組)」亞軍。編輯葉雨舟嘅〈囍匯堂皇 囍店絕迹〉亦奪得「最佳標題(中文組)」季軍。
攝記馮凱鍵、鄧宗弘、李紹昌同鍾林枝則帶來2季軍2優異獎。其中馮凱鍵去年喺旺角大衝突拍下〈血染年初夜〉，奪得「最佳圖片(新聞組)」 季軍；鄧宗弘作品〈「神奇小子」演活香港精神〉，捕捉拳手曹星如揮拳一刻，奪得「最佳圖片(體育組)」季軍。
