得獎電影票房差感內疚 惠英紅帶影后獎祭亡母

得獎電影票房差感內疚惠英紅帶影后獎祭亡母

[2017.04.11] 發表

【明報專訊】出爐金像影后惠英紅前晚在台上獲獎爆喊，之後出席英皇電影慶功宴時繼續感觸落淚，含淚多謝傳媒、老闆楊受成及導演羅耀輝。小紅說﹕「多謝你哋對我咁好，我唔係最紅嗰個，多謝你哋！」身旁任達華及溫碧霞上前吻賀，電影《喵星人》主角跪地獻花，小紅high爆說斗零唔收再拍羅耀輝的電影，並大讚楊受成是無得頂的老闆，之後更隊香檳賀封后。

願不收片酬拍羅耀輝電影

惠英紅受訪時心情仍未平復，提到亡母又再落淚。問到憑《幸運是我》封后是否特別感觸？她說﹕「無呃大家，大半個月前已好緊張，我一直覺得會輸，但好想攞獎，給阿媽一個交代。好多人唔知老闆因為這部戲出了好多錢，齣戲不是好賣錢，我個心一直有條刺，好希望攞呢這個獎時，在台上去感激老闆，所以對我來講是好大壓力。電影票房200萬也不夠，對我來講未試過咁差，所以感內疚。」

下次再拍導演羅耀輝的電影，是否不收片酬？小紅姐說﹕「是，導演很信任我，拍攝時媽媽病情已好嚴重，我話希望在造型上似媽媽，大家爭持了好耐，最後完全交畀我去演繹，多謝他對我的包容，真的再開戲的話，錢對我是重要，但不是最重要，今次可以給媽媽一個交代，導演是好大的功臣。」小紅講到亡母又再落淚，她愈講愈感觸說﹕「我無想過媽媽捱唔到。媽媽臨走時，我捉住她的手念經，我話姓惠的會幫你撐住，唔會丟姓惠的架，昨日是媽媽去世100日，媽媽在天之靈，會看到我攞獎的。(會帶同獎項去拜祭媽媽？)一定會，我好想畀媽媽知道我得獎。」

記者﹕梁榮達

攝影﹕梁迺楠

■更多娛樂猛料 ﹕ol.mingpao.com