【明報專訊】特首選舉都要靠名人效應谷民望，林鄭月娥有蕭芳芳撐，另一邊廂，曾俊華再次出動演藝界名人拍片支持，今次更係金像導演杜琪峯。杜琪峯噚日接受訪問時就解釋撐薯片原因，佢話自己同大部分市民都唔係選民、無份投票，但大家都希望有一個能夠令香港有和諧未來嘅特首，仲話「民意已經好準」。

盼令港變和諧特首

杜琪峯同Emily講，「希望選到香港、香港人畀佢最有信心嗰個，從民意大家可以睇到，香港對邊個有信心」。佢又話，其實曾俊華、林鄭月娥同胡國興3個入閘嘅候選人都好出色，但從自己角度睇，會諗邊個可以帶領香港和諧啲、發展順利啲。

讚薯片易同人傾偈

講番條撐曾俊華嘅短片，全長約5分鐘，杜sir話「活喺香港快62年，係應該要為香港講番啲嘢」，話有信心曾俊華能修復撕裂。佢又話輸贏唔重要，因為曾俊華已代表咗好多港人嘅聲音，「喺我心目中，你已經贏晒」。佢又話選舉只要係君子之爭就可以了，唔需要其他人講廢話，「嚇一嚇你、說東說西」。佢覺得曾俊華畀人嘅感覺唔係官、容易同人傾偈，唔似有啲人散發出「我係官、我大過你哋」嘅信息。

林太及胡官噚日無公開活動，林太喺facebook上載日前參觀中區警署保育群，推銷佢以前做官嘅工作。