【明報專訊】已經81歲、封筆多年嘅著名作家倪匡，雖然話熱愛閒雲野鶴生活，但仍對國際及時事好關注，講到近日因為美韓部署薩德反導彈系統，搞到內地一片反韓潮，倪匡笑言諗唔通：「點解係針對韓國，唔係嬲美國？我真係諗唔明。」

佢話呢啲本末倒置嘅事近日特別多，好似早前七警案判刑，坊間大罵洋法官，佢就話理論上法官都係按法律判案，反問點解唔係鬧決定檢控嘅政府同律政司。

講到特首選舉，問倪匡有咩睇法，佢笑笑答咗3個字，就係「無懸念」，咁即係睇好邊個呢？Emily聽到佢個答案就真係充滿懸念喇。

倪匡生活追求悠閒，仲自創打油詩「起身坐低吔吔叫，行多兩步攤攤腰，食飽瞓瞓瞓飽食，疊埋心水等寵召」作為生活原則。

雖然好耐無出書，但𠵱家仲有好多人對佢嘅作品有興趣，好想同佢合作，怕煩嘅倪匡今個月開始，索性將日後作品版權問題交畀契女，即係豐林文化傳播負責人施陳麗珠處理。倪匡話咁多年嚟，佢啲作品版權都畀過唔同人，都唔記得太清楚，話總之以後有嘢就搵施太傾啦。