網絡動員 反現有政策 林健鋒：曾俊華選舉工程似特朗普

網絡動員反現有政策林健鋒：曾俊華選舉工程似特朗普

[2017.02.10] 發表

【明報專訊】特首參選人今屆大打網絡民意戰，經民聯副主席林健鋒(Jeffrey)噚日同傳媒茶敘，講起美國總統特朗普，就話覺得曾俊華嘅選舉工程有啲似特朗普，因為特朗普主打反建制同網絡動員，而曾俊華都係反對一啲現有嘅嘢，例如TSA，亦爭取到網上支持。咁曾俊華可唔可以好似特朗普咁「爆冷」勝選呢？Jeffrey就無評論喇。

Jeffrey噚日茶敘後，即刻趕返金鐘經民聯總部同曾俊華、葉劉淑儀及胡國興3個參選人見面。佢喺茶敘話，經民聯見完參選人都要再開會至決定提名傾向，但就預告大家可以留意下星期一該黨茶敘，到時或有端倪。

至於近排有無上深圳見人大委員長張德江呢？Jeffrey不置可否，又參考黨友林建岳早前說法，話自己不時都會上深圳打高爾夫球喎。佢透露，經民聯遲啲會上深圳搞路向營，但最早都要4月，即係特首選舉之後。