財爺深水埗食腸粉 曾鈺成行工展親民

財爺曾俊華（左一）噚日同太太（左二）行街街，歎咗深水埗「名物」豬腸粉。（曾俊華facebook）

立法會前主席曾鈺成（左一）「拉隊」逛工展會，幫襯缽仔糕攤檔時，有人起哄話寓意官運「步步高陞」，佢聽完即刻大口咬啖。（李紹昌攝）

【明報專訊】特首選舉依然霧裏看花，不過疑似候選人最近就頻頻落區，展示親民路線。辭職休假嘅財政司長曾俊華噚日就去深水埗歎腸粉，另邊廂，立法會前主席曾鈺成「拉大隊」，帶民建聯成員，包括譚耀宗、周浩鼎、張國鈞、葉傲冬、鄭泳舜等逛工展會。

孖太太行街 財爺上高登

財爺曾俊華休假，噚日同太太行深水埗，食腸粉、米芝連點心，去埋cafe，仲上高登睇電腦產品，沿途有唔少人搵佢影相。中央尚未接受辭職安排，財爺官職在身，難言搞參選，但仍可把握機會搞親民活動。財爺喺facebook話，噚日同街坊近距離接觸，又品嘗咗美食，體會人情和活力。

曾鈺成大啖步步高陞缽仔糕

曾鈺成就去咗工展會，人氣都高漲，佢幫襯缽仔糕攤檔時，有人起哄話寓意官運「步步高陞」，佢聽完即大口食一啖。不過記者問嚟工展會係咪為特首選舉準備，曾鈺成即時講笑，話「我哋有成10個人嚟，咁我哋10個人都準備參選呀？」

噚日有傳媒引述，民記葉國謙早前見財爺，想勸退財爺，報道仲話民記唔支持財爺。曾鈺成噚日就話，事前唔知兩人會面，「我都係睇報紙先知」，又話據佢了解，現時民建聯唔會表態支持任何人，唔止曾俊華。譚耀宗亦強調現階段民建聯只係通知黨友，暫時唔好公開參與候選人有關活動。

另外，特首選舉提名期噚日正式刊憲，特首選舉於明年3月26舉行，提名期由2月14日情人節開始，到3月1日結束。選管會委任高等法院上訴法庭法官朱芬齡出任選舉主任，朱芬齡喺2005年都做過特首選舉選舉主任，當年曾蔭權喺無競爭者下自動當選。