【明報專訊】政府早前入稟提出司法覆核，要求取消梁國雄、姚松炎、羅冠聰同劉小麗嘅立法會議員資格。「民主動力」創會召集人鄭宇碩、佔中發起人陳健民同朱耀明，應4名議員邀請成立「守護公義基金」，向社會籌募資金應付訟費。陳健民希望首階段可以籌得500萬元。 稱暫無力幫梁游 青年新政梁頌恆同游蕙禎都面對司法覆核，不過，個基金就無預到梁、游兩個。鄭宇碩解釋，係受上述4個議員邀請成立基金。陳健民就話，目前除咗上述4個議員，真係未有能力幫到其他人，但基金若果喺司法覆核案件完結後有餘額，會協助其他同樣因政治原因面臨起訴嘅人，包括梁、游都可以申請。陳健民話，政府用公權對4個議員提出司法覆核，係踐踏立法會權力、干預立法會運作，同埋對議員政治迫害。陳又批評訴訟唔對等，因為政府可以用公帑，但議員一旦敗訴就要承擔巨額堂費，佢話政府嘅做法有違公義，擔心日後政府會用司法程序作打壓異己嘅工具。 「守護公義基金」會透過街站、網上眾籌等方式籌款，其中民陣元旦遊行會係重要嘅籌款途徑。鄭宇碩透露，民主黨同工黨都答應扣除十分之一上繳民陣嘅款項，遊行籌到嘅錢都會全數捐畀基金，而公民黨就需要開會討論，但初步反應正面。 基金由鄭宇碩、陳健民同朱耀明做信託人，陳、朱都曾經係佔中發起人，不過，「守護公義基金」就三缺一，唔見戴耀廷。朱牧話，佔中已經完結咗，雖然佔中三子不時走埋一齊，但大家嘅任務都已經完成。陳健民就話，相信戴耀廷目前忙於處理有關特首選舉嘅事。
|
| |
| |
;){kind=small}
