【明報專訊】全國港澳研究會副會長劉兆佳(圖)從事研究工作多年，曾擔任港府中央政策組首席顧問，𠵱家係全國政協，佢接受亞太第一衛視節目訪問，被問到做咗政府智囊多年，究竟中央政府接受佢意見程度多啲，定係香港政府呢？佳叔就話﹕「坦白講，那麼多年來，我提出的東西，在中央的接受度，比特區政府的接受度高一些！」

劉兆佳由大學跳入政圈，但形容自己「基本上是一個學者」，話所謂從政，都係以研究學者身分參與，將研究分析看法提供畀政府。不過，佳叔話唔好過度放大佢哋嘅影響力，唔會假設學者提出10個意見政府都會聽，政府聽咗兩項就已經唔錯。

少陪家人 對囝囝「愧疚」

佳叔又講吓鮮有提及嘅家庭生活，話自己將事業放得太重，對家庭有所忽略，太太當然有意見，「不過好在她比我更忙」，佢話兩夫婦喺屋企時間都唔多，各有各忙。佳叔話對阿仔都有「愧疚之處」，因為陪家人時間唔太多，而自己主要係言傳身教，唔會畀太多指導，話阿仔選擇自由工作者，從事有關寫作同公關事務。佢話阿仔無走爸爸嘅道路，而佢亦無主動建議囝囝走條咩嘅路。