【明報專訊】教育局長吳克儉(圖)前日約咗關注學童發展權利聯席(關學聯)代表見面，聽吓佢哋對教育同升學嘅意見，點知會開唔成不特止，仲變成facebook筆戰𠻹！

吳責遲到 團體：提早到場被拒入

吳克儉前晚喺fb貼文，話關學聯部分代表遲到半粒鐘，又「臨時增加人數和轉移場地，令大家平白錯失時間及交流機會」，好感慨咁話：「原本一次約好的會面，一次好好的交流，為何會節外生枝？」

關學聯其後喺fb專頁回應，仲向吳克儉發公開信，話佢哋其實係提早咗15分鐘到場，而教育局只限佢哋派14名代表參加會面，但唔少年輕成員想向局長表達意見，所以大家希望可以列席旁聽，點知被指無預先登記而被拒絕上樓，佢哋爭取改到旁邊嘅立法會、天橋或者公園會面，想解決登記問題，但都被拒絕。

「仲有兩分鐘，仲有無嘢想講」

關學聯喺fb上載片段，見到佢哋向局長爭取會面，但吳克儉好似變咗「倒數鐘」，當時一個鐘會面時間因雙方堅持己見已經唔見咗一半，局長可能真係好心急，Emily計番佢大大話話報咗6次時，由最初講「嗱，𠵱家少過25分鐘㗎咋，我𠵱家咪喺到囉」，數到「好喇，仲有兩分鐘，仲有無其他嘢想講」。

吳局長新聞秘書回覆Emily，局長好重視今次會面，特別抽空搵埋負責同事希望同佢哋交流，大家事前有溝通、講番會面議程，因應場地有限所以要事先溝通好人數，而14人其實都唔少，認為對方嘅臨時要求、拍攝直播都有違大家協議同默契。