【明報專訊】選委會選舉下月11日舉行，由大律師公會前主席陳景生帶隊嘅22人名單「ProDem21」、同公民黨主席梁家傑牽頭嘅「PanDem9」，噚日分別喺高等法院噴水池旁同低層4樓派發政綱，希望兩名單全取法律界選委30席。

法律界選委一向被視為民主派天下，兩張名單今次就以「九加廿一等如一」為口號，冀延續上屆全取30席嘅局面。對於退休法官胡國興率先宣布參選特首，陳景生話為咗引入競爭，都會盡量畀佢入閘，但就話對方未約過佢哋傾政綱。梁家傑就話佢哋30人一定唔會提名特首梁振英，認為係「毫無懸念」。

至於釋法對今次選情有無影響？陳景生話無，又覺得唔同人對釋法有唔同意見，而釋法本身都有好壞，但若衝擊到法治制度，就算有好處都彌補唔到。

單獨出選湯家驊想低調

民主思路湯家驊今次單獨出選，講明除非得梁振英一人候選，否則唔考慮投白票，認為唔應該浪費政治表態嘅權力，但話自己想低調，唔想令人覺得佢同泛民對着幹。建制方面，有曾挑戰立法會法律界議席嘅女律師文理明；法律界合共有37名候選人爭奪30席位。