【明報專訊】民建聯鍾樹根自從得唔到黨支持單獨掛帥出選立法會之後，人氣都幾勁，有線財經資訊台《政壇單打》亦搵咗樹根同公民黨陳淑莊(Tanya)打對台，Tanya問樹根，係咪真係做到「把根留住」。樹根就反駁，「乜你講嘢愈嚟愈似李慧琼！」Tanya梗係滴汗，話李慧琼講嘢係無表情㗎喎！樹根竟然哈哈笑表示認同。 樹根喺鏡頭外讚Tanya有「Camera Face」，而Tanya就向樹根教路，方法係叫樹根做吓Facial！ Tanya又講笑咁建議樹根可以同有意參選港島嘅王維基同台做節目，咁就可以直接同王維基直接講「收皮啦！」鍾樹根以前曾經用呢3個字窒過王維基，得幾十億身家去搞電視台。 兩人又傾到政改同佔中，樹根批評佔中之際畀節目主持人抽秤，話樹根都曾經率領過漁船封港，但樹根就反駁，話當年係因為政府唔聽佢哋意見，又話當時只係封港兩三小時，無大影響。呢個節目，喺今晚6點半播出。
|
| |
| |
