【明報專訊】立法會主席曾鈺成噚日宣布，由下屆立法會開始，立法會發出嘅傳媒採訪證唔再分網媒、紙媒或電子傳媒，任何合法註冊、主要從事新聞行業，以及有原創報道嘅媒體，都會獲發立法會採訪證。曾主席話，如果有網媒有採訪同立法會有關嘅新聞，就可以獲發記者通行證。 新東補選 網媒被拒入新聞中心 喺互聯網世代自然會有好多網媒產生，當中不乏專業嘅採訪同報道，但每逢政府官方活動，例如2月嘅立法會新界東補選投票日，網媒往往都被拒進入新聞中心採訪，限制網媒採訪引起唔少爭議。立法會係開明地方，過去都有容許網媒進入大樓採訪。曾主席話，今次引入新採訪指引，係要追上傳媒採訪需要。 另外，全國人大委員長張德江今日起訪港3天，灣仔一帶保安嚴密，但曾主席話立法會並無特別保安措施，因為張德江唔會到訪立法會大樓。曾主席提醒議員同立法會工作人員，未來幾日要預留充分時間，注意附近交通安排，因為交通未必會好似平時咁暢通。
|
| |
| |
