【明報專訊】《十年》日前喺香港電影金像獎奪得「最佳電影」殊榮，引起一輪爭論，身兼電影發展局主席嘅立法會體育、演藝、文化及出版界議員馬逢國(圖)，被問到點評價事件時，就以未睇《十年》為由唔評論呢齣戲。頒獎禮當晚佢坐足全程，話事前唔知亦從來無去八卦賽果，但佢講話任何頒獎禮賽果都難免有爭議，如奧斯卡都有頒畀黑人定白人嘅爭拗，仲講笑話任何賽事，「攞唔到獎就梗有人話唔公平，邊會有人話自己輸得心服口服呀！ 」

「邊會有人輸得心服口服」

《十年》得獎後，有聲音批評「政治綁架藝術」，並對金像獎評審口誅筆伐。有報道更指作為建制派業界代表嘅馬逢國要孭鑊。不過，馬逢國聞言後一笑置之，仲同Emily講，「如果我有資格孭鑊，金像獎就玩完啦」。佢話，政治有無凌駕藝術要由公眾判斷，世界上無一個頒獎禮嘅結果係合所有人心意，但佢認為香港有創作自由，至於頒獎與否係每個專業評審自己嘅決定，難講佢哋係咪想透過賽果做政治表態，又講笑話，或者有評判投票原因係同情年輕導演，想支持吓年輕人呢。不過，佢認為既然今次賽果咁有爭議，有人又質疑金像獎專業性，咁主辦單位可以同大家解釋清楚評審準則。

馬逢國話自己都好想睇吓套戲，但歸咎早前立法會拉布，搞到無時間，所以如果出DVD佢會去買。至於擔唔擔心香港電影會因為《十年》獲獎而被內地封殺，佢話睇唔到兩者有必然關係，內地對電影發行同上映有另一套準則，香港業界要打入內地市場，就要尊重內地準則喇。

另外，台灣自由時報網站報道，《十年》無疑係香港今年討論度最高話題電影，仲話將由佳映娛樂在台發行，預計8月就可以喺台灣大銀幕播放。