【明報專訊】港足喺日前凌晨舉行嘅世界盃外圍賽0﹕2不敵卡塔爾，無緣出線，本身係「球迷」嘅財政司長曾俊華噚日發表網誌提及呢場波，話佢同唔少香港人一樣「捱眼瞓」為港足打氣。佢又話回看今次世界盃外圍賽，港隊備戰認真積極，士氣高昂，每場賽事都展現無比鬥志同決心，更創下近年參與國際賽事佳績，相信香港廣大球迷絕對「收貨」。

勉學生遇困難可「暫停」

提起足球，財爺上星期出席《明報》「香港新機會——十三五規劃的挑戰」高峰論壇時，用「Leicester」(李斯特城)形容香港，但就無解釋，財爺喺網誌終於解畫。佢話，呢支外號狐狸(The Foxes)嘅球隊，喺132年歷史中從未贏過頂級聯賽冠軍，近10年更長期喺次級聯賽角逐。雖然球隊近年成功升班重回英超，但今個賽季開始前只被視為熱門「降班分子」，點知球隊表現大爆發，力壓一眾勁旅位列榜首，球迷「眼前一亮」，亦令球評家跌破眼鏡，證明比賽中「沒有事情是不可能的」。

財爺亦為近日多宗學生輕生事件感到非常難過同痛心，佢話成日會提醒學生，遇到一時解決唔到嘅問題，大家不妨暫停一下，好似喺比賽中為自己安排一個「Time out」(暫停)，紓緩壓力，仲要知道「you are not alone」，你唔係孤軍作戰㗎。