【明報專訊】一日逾800萬人次睇片 為人父母唔容易，香港爸爸Newman為博阿女一笑，單靠自己雙手抱上抱落架小單車，營造顛簸感覺，一路睇住電視片段，畀愛女一嘗踩攀山單車嘅滋味，Newman拍短片放上facebook，唔夠一日已經有逾800萬人次睇過。佢同Emily講，「只要帶畀個女快樂，你都會忘記咗嗰份疲倦」。Newman唔同一般家長，4歲半嘅女兒從未上過興趣班，只因佢堅持要給愛女一個快樂童年。 原來Newman係攀山單車愛好者，平時阿女成日要求踩埋一份，佢於是仿效網上片段，畀囡囡一嘗滋味。分幾鐘嘅短片內，只見Newman一邊捧住4歲半愛女慧慧嘅單車，一邊喺電視播放攀山單車手練習嘅片段，靠自己雙手將小單車郁嚟郁去，模擬單車行經山頭時嘅顛簸，不時震動小單車。慧慧大讚好玩，Newman話連細女都爭住玩。 「梗係玩最緊要」 有網友關心Newman會唔會好攰，Newman就話「只要帶畀個女快樂，你都會忘記咗嗰份疲倦」。呢名港爸有一套教女方法﹕「由細到大從無報過興趣班，細路仔成長時期最緊要開心，梗係玩最緊要，完全接受唔到𠵱家啲家長，要小朋友每星期上幾個興趣班。」 短片「衝出香港」，唔少海外網民都有睇，留言有韓文、泰文、西班牙文等，有網民見Newman玩得咁開心就話，「橫睇掂睇！點睇都好似係個老竇玩得重過癮開心(過)個女喎！」
|
| |
| |
;){kind=small}
;){kind=small}
