民記「真•民主」？ 曾鈺成：你哋有偏見啫
[2016.02.05] 發表
【明報專訊】民建聯立法會議員葉國謙將退下火線，該黨中委會早前通過設立機制搞黨內初選搵人接任，黨內區議員一人一票選出代表出戰，實行「真．民主」初選。對於民建聯內部實行民主推舉，相信唔少人都覺得驚訝，民建聯創黨主席、立法會主席曾鈺成就話，係你哋對民建聯有偏見啫！
一人一票選葉國謙位接班人
Emily聽聞，該黨主席李慧琼(Starry)堅持要確立機制，但對用乜嘢方案無堅持，該黨早前諗過唔少投票方法，但一度出現常委會建議、中委都無接納嘅情况，而現時呢個「真．民主」方案，據講並唔係Starry嘅首選方案𠻹呀！
Emily聽聞，遴選小組諗過可設立議員任期，即限制議員出任有關議席幾多屆就必須交棒，但民記中委會就認為剛剛確立推選制度，毋須立即設咁多條件。至於投票方法，該黨亦研究唔同方案，好似排序複選制，即係按選擇次序淘汰，區議員對參選人喜好排序，將低票候選人逐一淘汰，但最終中委會反覆討論後，就得出一人一票嘅方案。
目前民記內劉國勳、陳學鋒、洪錦鉉、鄭泳舜都有意參選，唔少人覺得牌面睇嚟對來自新界嘅劉國勳有優勢，Starry相信成熟嘅投票人唔會只考慮參選人喺邊個地區出身，更重要係睇吓係咪合適人選。民記呢個內部提名期2月底結束，劉國勳目前已爭取到該黨雙料議員陳恒鑌同新社聯會長梁志祥支持，難怪選情被睇高一線。
更多港聞
【明報專訊】今日係年廿七喇，解放軍駐港部隊司令員譚本宏中將及政治委員岳世鑫中將，噚日發出新年賀辭，祝市民新年快樂！軍隊嘅信函，結尾署名前，係...
詳情
相關新聞
