發哥劉嘉玲撐學友攞影帝 出口術叫劉德華張家輝讓獎
【明報專訊】周潤發、劉德華、張學友、劉嘉玲及張家輝等前晚出席賀歲電影《賭城風雲III》全球首映，5大巨星在台上妙語連珠，表演棟篤笑。剛公布的香港電影金像獎影帝候選名單，發哥與嘉玲齊聲支持學友爭奪當今屆影帝，竟幫口叫對手華仔及家輝讓獎。他們又笑談找周星馳合作拍戲很難，全因黃百鳴不肯做導演。
記者：鍾一虹、林祖傑
攝影：鍾偉茵
5位主角於首映活動前，先接受傳媒訪問。發哥甫出現即幽默地表示，很開心聽到片中拍檔學友、華仔和家輝均入圍候選今屆金像獎「最佳男主角」，又催學友快點出場，笑對方不要扮大牌。發哥又說：「嘉玲，得我和你無提名咋！如果問我，我都貼張學友攞。張家輝你讓吓你大佬(學友)啦，他未攞過。」嘉玲反問：「學友，你邊部戲入圍？我都贊成畀學友，我們做這行這麼多年，演技總會有，因他太少出來拍戲。如果我同周潤發是評審，一定選學友！」學友不是味兒說：「好鬼可憐，我在印度攞過，都感受過的！只不過當時印度經濟不好，無搞頒獎禮，只是通知有獎。」家輝即插嘴：「個獎有咖哩味！」
家輝普通話爛「搞喊」發哥
發哥大讚學友做印度影帝很厲害，但叫家輝和華仔讓獎給學友一嘗做金像獎影帝滋味，家輝笑而不話。發哥說：「家輝，你讓吓人，唔好咁狠啦！」怎料，輪到華仔出擊：「我都未攞，點讓呀？」剛從外地回港的嘉玲一頭霧水，再問：「還有邊個候選影帝？」華仔回答：「我、張學友、張家輝，跟梁家輝、郭富城。」發哥取笑嘉玲：「你現在是生意人！」
談到有否信心票房能破上集的10億元紀錄，家輝以普通話說：「票房去到20億只是底數，所以各位要扣好安全帶，迎接票房爆上去。」由於家輝的普通話很爛，令發哥笑到喊，要用紙巾抹眼水：「張家輝去跳海就有機會20億，會展後面有個海呀！」嘉玲稱：「如果有20億，立即開下一集！」
笑談再戲鬥周星馳有難度
提到發哥之前有個心願，希望找周星馳、張家輝及劉德華再合作拍戲，何時可實行？發哥表示：「星仔肯來就得啦！」家輝抵死地說：「這個就是難度！」學友附和：「如果唔係，今年都不用上《家有囍事》復修加長版啦！」言語間，似暗示周星馳不肯出山演戲。轉數快的發哥即拖埋黃百鳴落水：「嘩！黃百鳴做導演喎！」不明箇中意思的嘉玲提問：「黃百鳴有何問題？」發哥解釋：「他多數做男主角，叫他做導演，他咪無得做男主角囉！除非他好似家輝，導又得演又得，你讓吓人啦，唔好咁狠！」家輝笑稱：「我為興趣，無野心。」
華仔奉旨篤周潤發個頭
談及華仔相隔20年再伙拍發哥合作，戲中奉旨篤發哥個頭的感覺，華仔說：「第一take，我好似上了身篤他；到第二take不好意思，有少少屈到，就收手，點知被發哥話我揸流攤。」發哥笑華仔：「他細細個在TVB積怨，還不搵機會篤死我呀！」
進行首映儀式時，發哥逐一走到4位主角拍檔前面握手道謝，甚有特首出巡風範。華仔則大騷天王本色，面對傳媒鏡頭擺出不同甫士。貪玩的家輝即在身邊模仿，非常搞笑；當聽到台下粉絲喝采，立即派飛吻。嘉玲就被問到戲中如何在發哥與學友感情之間取捨，嘉玲說：「係，他們戲裏戲外都是好男人。」家輝問嘉玲對自己有何評價時，卻被嘉玲整蠱：「你係新演員，對你唔熟！」
■更多娛樂猛料 ﹕ol.mingpao.com
王晶：香港票房是內地1/25 懶理網民罷睇《賭城III》
【明報專訊】《賭城III》導演兼監製王晶，對票房充滿信心，毫不擔心受到打對台的《美人魚》及《西遊記之孫悟空三打白骨精》帶來壓力。他表示：「其... 詳情
