防流會 建制食飯「限」14分鐘 陳健波﹕13分鐘去埋廁所

防流會建制食飯「限」14分鐘陳健波﹕13分鐘去埋廁所

[2016.01.21] 發表

【明報專訊】立法會噚日繼續審議版權修訂條例草案，泛民繼續點算人數「拉布」，全日響鐘不停叫人返去開會。會議11點開始，建制派議員都坐定定，12點前兩次點人數，都喺7分鐘內召回足夠議員；不過去到中午食飯時間就比較險喇，其中一次點到去14分鐘(15鐘內出席人數不足35個就會流會)，建制派先陸續返回會議廳，原來建制派「班長」、民建聯葉國謙喺建制派WhatsApp群組溫馨提示，希望大家就算去食飯，都唔該爭取喺14分鐘內完事，返嚟會議廳。

「班長」葉國謙溫馨提示

財委會主席陳健波就最聽話，佢同Emily講，自己用咗13分鐘就極速食完飯、去埋廁所同洗手，可以繼續坐番入會議廳工作，但其他建制派就無咁有效率喇，一餐飯都要分幾次食，結果12點半到兩點期間，就已經點咗5次人數，一度只差1分鐘就流會。

雖然事前建制派講明盡量會「坐定定」，確保唔好流會同唔好浪費時間點人數，等條例盡快進入「全體委員會審議」階段，但知易行難，始終有人要離開唞唞氣，結果催魂鐘聲全日響不停。

蔣麗芸跑到索氣免流會

至傍晚時份更加出現自由黨唔齊人、工聯會兩名議員又要出席長者晚宴，令立法會又有流會危機，其中一次只差十幾秒，民建聯蔣麗芸驚流會，跑到索晒氣咁希望救個會，最後有驚無險。

噚日會議共響鐘召喚法定人數25次，消耗咗4小時35分鐘，商務及經濟發展局長蘇錦樑會後話，噚日係二十四節氣中嘅「大寒」，天氣寒冷，形容版權條例亦係「冰封狀態」，「立春就到，希望議員畀市民一啲希望、一啲溫暖」。