梁美芬睇《十年》﹕劇情屈中央

[2016.01.21] 發表

【明報專訊】港產電影《十年》最近成為話題之作，雖然得幾間戲院上映，但幾乎場場爆，票房突破300萬元。呢套戲題材敏感(含劇透)，而近期話要潮啲嘅經民聯梁美芬，前晚都去捧場，佢睇完話心情好沉重，話特別唔同意戲中美化自焚行動及宣揚港獨思想，仲話故事劇情有啲跨張，屈咗中央喎。

網民留言叫反省懺悔

近期愛玩facebook嘅梁美芬前晚上載入場睇戲嘅相片，仲留言話「人生有幾多個十年？」結果唔少網民share佢個post及留言，有唔鍾意佢嘅網民話，「其實妳可以用睇戲嘅個零兩個鐘，反省吓妳一生人所做嘅壞事，懺悔吓！」有人就話美芬係咪搞錯咗，以為《十年》係愛情故事。但亦有人讚好，話咁多人留言畀佢，證明佢人氣爆燈。留言中仲有「游學修 Neo Yau」，話欣賞芬芬，仲問梁美芬「喜歡我戲中的反叛憤世形象嗎？等睇你的觀後感」。

Emily於是捉住梁美芬傾吓。呢套戲分5個單元，都係講2025年嘅香港會變成點，梁美芬就話套戲比想像中政治化，佢唔同意戲中美化自焚行動，又借機宣揚港獨思想，形容係太極端同危險，認為呢啲行為無助年輕人追求理想。

梁美芬話，套戲亦有提到小學生要參加「青年軍」，變成「小紅兵」，但佢就覺得用文革去描述香港未來係好out，無乜真實感。至於一幕講到當局用暗殺政黨領袖，要製造恐慌，乘機推動國安法，梁美芬話會令人覺得係屈中央，無乜說服力。

強調自己反普教中

至於講廣東話日漸消失嘅單元，梁美芬話拍得唔錯，強調自己好反對用普通話教中文，又話廣東話、英文雙語教學，都無阻學生對香港有感情喎。