【明報專訊】特首梁振英噚日公布《施政報告》後，今朝再去立法會出席答問大會接受質詢，同立法會議員「過招」。根據《議事規則》，喺以往答問大會上發問次數最少嘅議員，可以優先向特首提問。Emily望過名單，經民聯劉皇發同醫學界梁家騮最有優先權發問，事關佢哋過去分別都只係問過1次。不過自從「等埋發叔」嘅政改表決後，發叔就鮮有露面，相信今次佢都唔會現身。 只有5名議員喺之前答問大會問過兩次問題，相信今日都有機會向特首提問，當中包括民主黨何俊仁、涂謹申，自由黨田北俊、方剛，以及民建聯蔣麗芸。Emily相信，除咗蔣麗芸外，其餘人發問都未必留情面，相信今日會擦出唔少火花。不過阿涂會飛去台灣睇大選，放棄與特首火併機會。至於田大少，佢就喺facebook預告，「特首在施政報告提咗『一帶一路』42次。而李波一次都唔提，乜特首唔關心『一國兩制』仲守唔守住㗎？等我有機會問個究竟先！」
|
| |
| |
