【明報專訊】食物及衛生局長高永文今個月初參加長跑比賽時，起跑無耐就畀細路仔絆倒受傷，要縫針兼休養。署理食衛局長陳肇始噚日出席活動，Emily當然趁機關心吓局長傷勢。陳肇始話高永文暫時仍喺屋企休息，傷口已經拆線，佢與同事仲不時有聯絡傾吓工作。Emily都好佩服局長咁投入，連放病假都放唔低個擔子。高永文嘅新聞秘書其後確認，高醫生今日就會返政總復工。

當日嘅長跑比賽，有個男童起步後跌倒，高永文閃避唔切絆倒向前仆，面部着地，血流滿臉，即刻送院。今次佢都跌得幾傷，除咗額頭、眼下同唇邊縫咗幾針，顴骨都有少少裂咗，好彩𠵱家已經無乜大礙。至於跌倒嘅男童就無受傷。