【明報專訊】外號「阿叻」的香港無綫藝人陳百祥言論向來惹火，他周六接受電台訪問，認為中央早應全面收緊香港管治權，反問主持：「你係咪中國人？點解(香港)唔俾中國管？」另外，他又批評網民「憎人富貴厭人貧」，又指年輕人「讀壞書」，更點名指黃之鋒連「8間大學」也考不入，「咁我點話你叻」？黃之鋒則於facebook回應時反問：「考唔到八大又有乜問題？陳百祥無讀大學兼會考得13分，咪照樣做咗一線藝人。」 對於「一國兩制」，陳百祥認為到2047年也是要歸中國管治，不覺得現時有逐步收緊「一國兩制」情況，「每個人都仍能罵特首」。他稱，《基本法》一早已講明特首選舉辦法，「你接唔接受都無用，因為呢個國家唔係你嘅，唔係你打出嚟嘅天下」。 另外，陳百祥在節目中說網民是一班「憎人富貴厭人貧」的人，「唔想你富貴又唔想你好，但見到衰嗰啲，佢又睇你唔起」。 他更指現時年輕人「讀壞書」，「你同我考12個A給我看，唔通黃之鋒會考到咩？佢連考8間大學都考唔入，咁我點話你叻？」 主持人追問他是否以考試高分為「叻」的標準，陳百祥表示，考試高分是「叻」的第一步，「至少不會搞事」。 黃之鋒其後在facebook回應時提到，現時中學考試已經轉制，不再看有多少個A，而是有多少「5**」，「呀叻今鋪上電視獻醜話比全香港聽自己脫節，連公開試轉咗制都唔知，真係叻到不得了」。他亦強調：「我叻唔叻根本唔係由你判斷，亦唔需要向你交代，只要我向到自己負責咪得。」
|
| |
| |
