【明報專訊】區選進入倒數階段，任何會影響選情嘅攻擊，政黨都特別着緊。噚日民主黨同傘兵組織「青年新政」就立法會一項議案嘅投票取向喺網上駁火。事關立法會大會噚日表決「保障香港人不受大陸化」議案，喺建制派集體反對下遭否決，不過有即時新聞一時手快，誤指民主黨喺原議案中投棄權票。與民主黨喺部分選區有撞區嘅青年新政隨即轉載報道，質疑民主黨點解投白票，拒絕保障香港不受大陸化。唔少網民留言鬧「民主黨賣港」。 不甘「被屈」嘅民主黨立即出聲明，澄清絕對支持原議案，只係唔同意其後范國威修正案中「徹底取消一簽多行」嘅建議，認為有違對等原則，所以投棄權票。民主黨又批評「有人斷章取義，故意抹黑」。 民主黨：故意抹黑 青年新政：請搏盡反對 雖然青年新政其後出post承認資料有誤，向市民致歉，但就質疑民主黨若要尊重對等原則，「要麼爭取雙方均一簽X行，要麼雙方均無限制出入境。請問民主黨準備爭取哪一個做法呢？」青年新政更用民主黨選舉口號諷刺對方，話「還請貴黨搏盡，光明正大的投下反對票好了」，火藥味極濃。鬧得咁狠，唔知係咪與青年新政同民主黨喺3個選區相撞有關？
|
| |
| |
;){kind=small}
