【明報專訊】立法會財委會上周五通過創科局撥款，財委會主席陳健波大刀闊斧「剪布」；佢噚日出席商台節目時批評拉布「神憎鬼厭」，提議可考慮以扣減議員薪酬及開多啲會等方法抗衡拉布，仲大罵香港選舉畸形。主持反問，用選票係咪可以「懲罰」拉布議員？但波哥就直指現時香港選舉「畸形」，「佢(候選人)可能2萬票3萬票已經(當選)得啦嘛。我講嘢太過直，希望大家原諒」。

此言一出即引嚟網民熱議，唔通波哥曲線鬧緊689票當選嘅特首梁振英？亦有人問，咁波哥自己功能組別出身，「零票」自動當選又點理解？陳健波就解釋，保險界百幾間公司，全部行政總裁嚟㗎嘛，叫大家唔好低估功能組別，仲叫主持「你試吓去保險界選吖」。

Emily翻查上次立法會選舉，直選中多達20人屬波哥口中「2萬、3萬票」嘅議員，連得票3萬幾嘅立法會主席曾鈺成都有份。反而「拉布」議員社民連梁國雄同人民力量陳偉業就無份，以4萬幾票當選。Emily同事問過幾個2、3萬票嘅議員，新民黨主席葉劉淑儀話「我唔會話目前(選舉)制度畸形，我唔會咁樣講」，唔少泛民就建議波哥一齊參與直選咁話。