【明報專訊】特首梁振英(CY)日前展開任內第四次《施政報告》諮詢，各政黨陸續收到佢嘅邀約會面，希望大家就施政報告提供意見。不過，公民黨噚日率先表態，唔會應CY之邀。黨魁梁家傑仲講到明話要孤立CY，因為特首連開facebook都要「揀擇朋友」，又經常「撩交打」，咁樣嘅人見嚟都係「嘥聲壞氣，無意思」。 民主黨工黨唔會杯葛 不過，傑哥補充話佢哋好關心民生經濟，所以只係「唯獨唔見CY」，其他人照樣會見，包括會主動邀請司局長，仲會公開發表公民黨對施政報告嘅意見。 民主黨、工黨及其他獨立泛民議員就話唔會杯葛，仲分別定咗下個月唔同日子見面。工黨何秀蘭話「追數梗係要當面追」，到時會提及勞工議題及防止賄賂條例等。至於公民黨拒見CY會唔會太小器？民主黨單仲偕話「各有各做法」。 不過，人民力量話仲未收到邀請，陳志全笑言其實對見面無期望，感嘆唔需要再提乜意見，「做番之前承諾嘅已經好好啦」。而民建聯就應承咗特首11月12號見面，工聯會未談妥時間。
|
| |
| |
