【明報專訊】南丫海難同佔領運動後，今年復辦國慶煙花匯演，適逢中國抗戰勝利70周年，主辦單位原本安排第三幕以「抗戰勝利70周年」做主題，維港兩岸會響起「警報」20秒，仲會播放猶如日軍飛彈喺上空轟炸嘅聲響，話想令市民感受到「戰爭嘅恐怖」。但消息公布後，各界批評嘅聲音仲響過飛彈轟炸聲，包括話「紅事撞白事，到底係國慶定國殤？」主辦單位噚日話為安排引起大家「關注」而致歉，第三幕會改為「和平」，配以關正傑首《愛的音訊》做背景音樂，放棄播空襲警報。

和平為主題 現「紅心」

煙花技術統籌仲話，贊助商贊助煙花匯演嘅原意係期望為社會帶來歡樂，注入更多正能量，所以聽咗社會各界寶貴意見後，決定改咗第三幕主題，其間會出現「紅心」，話要將愛送到每個角落。

公民黨立法會議員陳家洛就形容係「好核突嘅下台階」，批評有人連搞煙花匯演都有「政治考慮」，「以為設想周到，擦阿爺鞋(紀念抗戰)，點知落錯鞋油擦錯鞋」，公布咗先嚟改係「騎呢、突兀」。

今次煙花匯演由中滔環保集團贊助、香港廣東社團總會協辦，耗費800萬元，喺10月1日(周四)晚上9點喺維港上空綻放，分為9幕，歷時23分鐘，將以3艘躉船發放23萬多枚煙花。