【明報專訊】政府噚日出稿宣布，委任資深傳媒人梁家榮(榮總)擔任廣播處長，輿論唔算太負面，但Emily就見唔少當年做過榮總學生嘅中大新聞與傳播學院舊生，紛紛喺facebook話當年，講番當年榮總上堂經歷，似乎大家都覺得榮總教書都幾harsh，皆因佢毫不客氣，鍾意喺同學嘅功課寫上「垃圾」、「廢話」等評語，仲有人話畀佢嘅功課10分只拎到0.5分！ 「如果你係我伙記 早就炒咗你！」 榮總前幾年喺中大教廣播新聞同新聞翻譯兩課程，相信唔少讀新聞嘅學生都有上過。當年榮總出名係「殺手」，唔係點派好grade畀學生，而佢上翻譯堂，就不時講吓中東等國際新聞同背景，而學生每堂都要翻譯外電，但得番嚟嘅評論都幾狠。 有上過佢堂嘅學生話，10分滿分嘅功課試過拎2分，中間夾雜「廢話」同「舊聞」等評語，有同學更留言話，拎過榮總畀嘅0.5分或者1分。有人就話畀人評過功課係「怪中文」同「垃圾」。有做過佢學生嘅現職記者仲話，當年畀榮總狠批過，「如果你係我伙記，我早就炒咗你！」 學生電郵指其錯 獲回覆道謝 另一個舊生就話，當年榮總曾經指正佢話台灣「蒜」字係指蠢，學生唔服氣，寫電郵同榮總解釋並唔係咁解，獲得榮總回覆道謝，仲話「所有在我人生中教導過我新知識的，都是我的老師」。 唔知榮總接管港台，又會唔會做魔鬼老細，用「垃圾」呢類評語回應下屬呢？
|
| |
| |
;){kind=small}
;){kind=small}
