【明報專訊】登登登櫈，支持警察、一直倡議香港要設「辱警罪」嘅民間組織「正義聯盟」，宣布下月變身成「正義聯盟黨」，組織召集人李偲嫣會擔任黨主席，話要尋找建制泛民以外嘅第三條路喎，佢話考慮派人出選區議會、立法會，以及新界東立法會補選。李偲嫣話會為中產同基層發聲，又話自己唔係「富貴黨」，經費方面要靠市民支持。

設辱警罪係大方向之一

李偲嫣強調組黨唔係為咗選舉，而係希望可以為市民發聲。至於有乜嘢未來大計，佢話爭取設立「辱警罪」將會係大方向之一。

李偲嫣對組黨一事好似好認真，話會成立一隊顧問團，負責政治、經濟、教育、社會福利等各方面政策研究，仲話會邀請友好、經民聯立法會議員梁美芬擔任「辱警罪」法律顧問。Emily問過梁美芬，佢話知道李偲嫣組黨一事，話有新人參政都係好事。