【明報專訊】區議會選舉今年11月舉行，上次公民黨唔少「明星」都挑戰區選，包括湯家驊、陳淑莊同郭榮鏗，但都敗北，今次呢3人唔打算捲土重來，但該黨立法會議員陳家洛就有意出戰區議會，喺上次郭榮鏗戰敗嘅南區海怡東出戰。公民黨秘書長賴仁彪話，部署唔係主力為下年立法會選舉「超級區議會議席」而做，但想製造焦點，希望大家留意公民黨都重視區選喎。

黨否認為超級區會部署

賴仁彪話，公民黨區選大約會派25至30人出選，而陳家洛喺黨內機制，已經過咗港島支部同地區發展委員會兩關，有意參選者仲要由黨魁等人面試，佢相信家洛下星期就會走呢個程序。下年立法會選舉，港島區減一席似乎勢在必行，賴仁彪話呢個亦係游說家洛出戰區會嘅其中一個理由，「當多一個機會、下年多條路走(超級區議會)」。又係嘅，如果港島減一席，公民黨好難喺港島取兩席，意味家洛同陳淑莊好難雙雙勝出。陳家洛話考慮出選區議會，但最終都係由公民黨決定。