偲嫣學界三子世紀握手 《城市論壇》35年

偲嫣學界三子世紀握手
《城市論壇》35年

[2015.04.13] 發表

【明報專訊】香港電台節目《城市論壇》噚日喺老地方維多利亞公園舉行35周年慶祝活動，近半百個左中右政界人士、草根階層、少數族裔同學運領袖，齊齊出席《論壇》生日會。主禮嘉賓之一、立法會主席曾鈺成仲講笑話他日唔做議員，「個個星期嚟維園，做維園阿伯」，台下唔少維園阿伯都拍掌叫好。生日會仲搞和諧，促成愛國陣營高達斌、傅振中同李偲嫣，同學界三子黃之鋒、羅冠聰同張秀賢來個「世紀握手」。

建制同泛民主派政黨都有唔少人出席慶祝活動，但就唔見問責高官身影。主持謝志峰話，邀請咗行會召集人林煥光、保安局長黎棟國、勞福局長張建宗等官員，可惜大家都唔得閒。

建制泛民齊撐高官缺席

謝志峰原本諗住邀請特首梁振英同政務司長林鄭月娥，但同「江湖高人」討論後，要二人出席「唔係好現實」，所以最終都無發正式邀請。

謝志峰趁生日會向維園阿伯送大禮「拋橄欖枝」，取消實施半年嘅安檢措施，以後入場都唔需要再查身分證。佢話如果一個月後都無事發生，連檢查手袋嘅做法都會取消。

雖然係《論壇》生日會，但一眾維園阿伯阿嬸一樣無面畀，見到台上有泛民議員就繼續狙擊，不斷喺台下叫罵、打斷議員發言，首當其衝嘅民主黨主席劉慧卿好勞氣咁話「好過分囉」。同台嘅曾鈺成笑笑口話?家「世界輪流轉」，憶述1990年代初，自己喺民建聯成立翌日出席政黨公開論壇時，「我一開聲就被人噓，劉慧卿一出場，嘩，全場熱烈鼓掌」。