【明報專訊】呢兩個禮拜香港政治低氣壓，令好多人都囉囉攣，先係呢個禮拜有大專生同中學生罷課，下個禮拜可能出現「民主盛宴」，特區政府個個都好緊張，Emily聽聞，特首辦主任邱騰華原來本周二起放假，好似要10月5號先返工，咁啱橫跨咗可能佔中嘅時間，有說佢早早安排今次休假，無估到佔中咁早發生，不過政府新聞處長聶德權請假送仔去英國讀書，周六已回港，理論上可以補位。

之前被質疑罷課先嚟放假嘅教育局長吳克儉，噚日復工喇，而為咗陪仔仔嘅政務司長林鄭月娥，休息咗5日，下個禮拜一亦可返添馬開工。