【明報專訊】每年一度嘅電腦通訊節，今個月22至25號喺灣仔會展舉行，主辦商話，因為場地租金等成本上漲，所以今年門票要30蚊，加咗5蚊。Emily知道唔少人去電腦節都想「掃平貨」，但主辦商今年會取消「一元優惠」，改用「擦擦卡」抽獎送出特價產品，包括電視、手提電腦等，至少都有20蚊購物券，希望可以減少混亂。 香港電腦商會會董張耀成話，過往嘅一蚊貨品令場面好混亂，唔單止有排隊黨阻塞門口，又令其他消費者無法得益，所以改做抽獎。 網上平賣場內取貨吸人流 另外，商會今年同拍賣網合作「一錘定價」活動，提前喺電腦節前以低於市價兩至三成賣75款電子產品，每款限售5至10件，吸引網購客入場取貨，希望可增展覽人流同消費。 主辦商估計今年入場人數會增加5％至10%，突破70萬，預料生意會多一成，令總營業額去到3.3億。
|
| |
| |
