【明報專訊】每逢特別節日或者紀念名人，Google首頁嘅logo都會換上特別嘅圖案或設計，為咗宣揚環保理念，Google早前喺香港首次舉行設計比賽，以「如果我是環保英雄…」為題，邀請全港幼稚園同中小學創作屬於香港嘅「Google圖案」，共收到3500份作品，經過評審團挑選再交畀全港市民網上投票，最終由博愛醫院鄧佩瓊紀念中學中六學生黃昭蓉嘅作品脫穎而出，成為總冠軍。

今日首頁貼24小時

黃昭蓉分享設計理念時話，由於水係地球珍貴資源，同時滋潤萬物，延續大家嘅生命，令大家享受綠色生活，因此作品以水同樹木作為主題。Google亦趁住本港今日係綠色星期一(Green Monday)，將佢嘅作品喺Google香港首頁「貼堂」24小時。大家今日瀏覽Google網頁時，不妨留意吓呢個圖案。