【明報專訊】即將有1600隻紙熊貓喺6月「佔領」香港。由中環荷李活道前已婚警察宿舍活化成嘅創意產業中心PMQ元創方，嚟緊會同創意工作室AllRightsReserved合辦「1600熊貓遊香港‧創意X保育」巡迴展，首度在港展出由法國藝術家Paulo Grangeon同世界自然基金會(WWF)合作、用回收廢紙製成嘅1600隻紙糊熊貓，呼籲港人支持保育。一個月內會以「快閃」形式喺10多個地點巡迴展出，包括機場、天壇大佛、青馬大橋、沙田馬場、紅館、尖沙嘴鐘樓、維園同海洋公園，終點站去番PMQ，然後再展出一個月。

主辦單位話1600代表全球野生熊貓僅存數目，當去到每一個站，其中一隻熊貓仲會「入鄉隨俗」，例如喺馬場佢會掛上馬鞍，喺大佛就手持蓮花，由於每個站淨係得一隻特別造型熊貓，到時要考大家眼力喇。另外當日落雨嘅話，紙熊貓就會稍作休息唔現身。詳情可瀏覽facebook.com/1600Pandas。