【明報專訊】香港、台灣合作愈來愈多，早前台灣反服貿嘅學運，唔知有無影響港台關係？港台商貿合作委員會主席李大壯(David)噚日同傳媒茶敘，匯報過去一年工作，話台灣同香港嘅合作都唔着眼政治問題；又將太陽花運動同佔中比較，覺得兩者唔一樣，相信唔可以將台灣一套照搬嚟香港。

David話，佢覺得佔中同太陽花運動最唔同嘅，係兩地退場機制唔同，佢形容反服貿嘅都係「專業學生」，喺台灣即使犯咗刑事法要坐監，都會變成「美麗島」翻版，學生有機會從政，亦有台灣企業家表明會聘用佢哋。佢直言香港數嚟數去，都係得民政事務局長曾德成，當年為咗理想而坐監，令佢放棄入大學機會，而大部分港人比較現實，學生多數會選擇回歸校園而唔係街頭運動，相信即使佔中向台灣學運取經，都唔可以成套搬過嚟。

至於佔中同政改，曾擔任全國政協委員多年嘅David就話比較樂觀，預料10月就會知中央會否畀普選香港，11月底台灣就有「七合一」選舉、12月就有澳門特首選舉，佢相信中央無可能點火頭，又形容中共唔係一成不變、不可理喻，相信處理香港問題講原則之餘，都有靈活性，有信心會有一套大家都接受嘅政改方案。